Os Dereitos Humanos, nos "Camiños de Redondela"

"PANFLETOS" DOS DEREITOS HUMANOS

O día 10 de decembro, co gallo do aniversario da Declaración Universal dos Dereitos Humanos (ONU, 1948) fixemos esta actividade en 2º ESO:

Estudamos os dereitos que cada persoa ten soamente por ser persoa.
Buscamos exemplos deses dereitos...
... pero tamén exemplos de como se violan en todos os países.
Preparamos os panfletos resumindo o que aprendimos...
... e saímos a rúa para entregarllos a toda a xente da vila.

Traballamos en colaboración co Proxecto de Biblioteca sobre os Camiños de Redondela e coa Rede de Escolas de Amnistía Internacional. Neste post resumímovos como fixemos esta tarefa, na que o pasamos xenial.

1. Estudamos os Dereitos Humanos
Para isto utilizamos o libro, ademais (por suposto) do texto da Declaración

Un dos nosos principais recursos en internet é a páxina da Rede de Escolas de Amnistía Internacional, da que hai un grupo en bacharelato neste centro. Podes vela picando na imaxe:

2. Preparamos os panfletos 
Despois de buscar os exemplos tratamos de poñer en frases sinxelas e que todo o mundo poida entender...

... algún artigo da Declaración
... algún exemplo de violación dos dereitos
... algunha ONG que vixíe e traballe para que se cumpran

A continuación escribimos esas frases en papeis de cores e decorámolos ben.

3. Saímos á rúa
Xa temos todo preparado! Agora collemos o noso "material subversivo" e saímos polos Camiños de Redondela, como di o Proxecto de Biblioteca deste ano. Pensar que nalgúns países poderían deternos e incluso matarnos por facermos isto!
Primeiro fumos ao Concello, ao Mercado e ás tendas de arredor da alameda: 

Despois, á zona da Mariña e ao Centro de Saúde. Pedimos permiso para non molestar ás persoas que estan enfermas ou acoden a unha cita médica:

-Por que me foxe toda a xente?
-Porque te achegas gritando e o último que pensan é que lles vas dar un panfleto pacifista.
-Ah!

... pero, en xeral, todo o mundo nos recibe moi ben e dános as grazas por divulgarmos esta información que, moitas veces, non coñecemos tan ben como deberiamos.

4. Bótalles unha ollada!
Esta é a nosa colección de panfletos. Bótalles unha ollada!: 

Cidades iluminadas contra a pena de morte - 30 de novembro de 2012

Fagamos da pena de morte unha pena en extinción

No grupo da Rede de Escolas de Amnistía Internacional do noso instituto celebramos o día internacional das cidades iluminadas encartelando un debuxo dun viaduto para estar á altura da nosa vila, que puxo tres carteis ben grandes na fachada do concello.

Neste caderno deixámosvos un resumo das ideas e os actos que nos moveron neste día:

10 de Outubro, día internacional contra a pena de morte

REDE DE ESCOLAS DE AMNISTÍA INTERNACIONAL
O 10 de outubro é o Día Internacional contra a Pena de Morte. No IES Pedro Floriani celebrámolo con varias actividades:

Mapa cos datos de 2011
Un mapa no que se amosa como cada vez hai menos países que apliquen a pena de morte, aínda que neles creceu en 2011 o número de execucións.

Exposicións de carteis: Persoas condenadas a morte
Historias de persoas condenadas: as súas idades, as condicións en que foron xulgadas... Amnistía Internacional oponse a todas as execucións, sexa cal sexa a gravidade ou as circunstancias do delicto.

Exposicións de carteis: Derradeiras ceas
O que pediron para cear algunhas persoas executadas.

Salientamos a petición de Victor Feguer:

Unha simple oliva. Así, segundo el, unha oliveira nacería do seu corpo como un símbolo de paz.

Proxección de vídeo-clips
Durante o recreo proxectamos algúns vídeos de Amnistía Internacional, que traducíramos en clase de inglés.

Poñemos aquí dous deles, un no que Jeremy Irons explica a inxustiza e inutilidade deste castigo...

... e outro que informa sobre o retroceso conseguido en 2011 e outros datos que proporciona Amnistía Internacional na súa páxina web.

Colaboraron:

Rede de Escolas de Amnistía Internacional - Grupo do IES Pedro Floriani. Departamento de Inglés e alumnado de 1º e 2º Bach. Departamento de Orientación. Biblioteca e Plan Lector.

 

Acción contra a pena de morte

REDE DE ESCOLAS DE AMNISTÍA INTERNACIONAL

O IES Pedro Floriani pertence á Rede de Escolas de Amnistía Internacional. Este ano, o departamento de filosofía colabora na acción contra a pena de morte que organiza esta ONG:

Outubro e novembro serán meses de mobilización contra a pena de morte, co 10 de outubro, Día Mundial contra a Pena de morte, como data clave. O período conclúe o 30 de novembro, xornada das Cidades Iluminadas pola Vida. Este ano a mobilización centrarase en resaltar os avances que se lograron no camiño cara á abolición da pena de morte no mundo e destacar como, a pesar da tendencia abolicionista, os países que máis aplican a pena de morte, cada vez executan a máis persoas. É o caso de Arabia Saudita, país foco da nosa atención este ano. Neste contexto recolleremos firmas a favor de Siti Zainab Binti, condenada á morte en Arabia Saudita desde o ano 2000.

 
No noso centro comezaremos cunha reunión o día 26, na aula 24, ás 11:30 na que veremos dous video-clips informativos e informaremos de dúas accións para realizar nos dous días sinalados. Copiamos aquí o primeiro clip, pero para máis información pódese consultar as páxina de AI de vídeos, materiais para as aulas, rede de escolas, etc.

Presentación

Ola a todxs! Comezamos a publicación neste blog das actividades do Grupo da Rede de Escolas de Amnistía Internacional do IES Pedro Floriani de Redondela. Esperamos que nos sirva para un intercambio de experiencias e ideas e para animar ao alumnado dos nosos centros a loitar polos dereitos humanos. Un saúdo!